سر رياضة كمال الاجسام

السلام عليكم ورحمة الله

 سر رياضة كمال الاجسام هتلاقيه فى اسمها ( كمال الاجسام )
يعنى الاكتمال والتناسق والتوازن العضلى والذي نسميه بلغة اللعبة (( السيمترية ))
عشان توصل للكمال العضلى او تقترب اليه بمعنى أدق لازم من أول يوم لك فى اللعبة تكون فهمت أهم وأول وأعظم وأقوى قاعدة فى كمال الاجسام وهى : (( العضلة وعكسها )) وده معناه :
كل عضلة بتاخد قوتها أو الباور بتاعها من العضلة الى عكسها الى بيخليها تشيل أوزان أكبر وتلعب بتركيز وأداء أعلى
فمثلا لو قسمنا الجسم الى أربع أنواع من العضلات وهى :
عضلات كبيره : بنش ء ظهر ء كتف
عضلات صغيره : باى ء تراى ء ترباس ء ساعد ( الاطراف العلوية )
عضلات وسطى : بطن وجدارها الى هو الجانبيات والمنشاريات ء والقطنية
عضلات النصف الاسفل : الرجلين والسمانه (الاطراف السفليه)
لو اشتغلنا على التقسيمة دى هتلاقى كل عضلة أمامية كبيره بتاخد قوتها من العضلة الخلفية الكبيره الى عكسها او الى وراها والعكس صحيح فمثلا : لو كان الحزام العلوى عندك فى الظهر يعنى ظهرك من فوق ومن المنتصف قوى وعضلاته مثقلة هتلاقى نفسك بتزق اوزان جباره فى البنش وبتلعب بتكنيك واداء وتركيز عالى والعكس صحيح وده معناه ان عضلية امامية كبيره بتاخد قوتها والباوربتاعها من عضلة خلفية كبيره
كذلك الحال فى العضلات الصغيره الباى والتراى لو اوزانك فى الباى شديده والباى مثقل ومحمل بالالياف العضلية القوية هتلاقى وقتها اوزانك فى التراى شديده جدا والاداء والتركيز عالى ونموذجى والعكس صحيح وده معناه ان عضلة صغيره خلفية واخده قوتها من عضلة صغيرة امامية
كذلك برده العضلات الوسطى البطن وجدارها / القطنية ، قوة لعبك واداءك فى البطن والتركيز العالى والحجم العضلى والظهور الكامل لعدد عضلات البطن بيجى من قوة القطنية وصلابتها والعكس صحيح
وهتلاحظ ضعف أداء وضعف حجم فى عضلات البطن عند اللاعب المهمل فى اداء ولعب تمارين عضلة القطنية

وجدير بالذكر برده ان فيه عضلات صغيره امامية قوتها بتساعد فى قوة عضلات كبيره خلفية زى علاقة الباى والظهر لو الباى عندك عضلة شديده ومثقلة هتلاقى اوزانك فى الظهر والمجنص جباره لانه بالطبيعه بيشتغل معاه فى الاداء
والعكس كذلك فى علاقة التراى بالبنش او الكتف لو التراى شديد ومثقلل العضلات هتلاقى اوزانك فى البنش او الكتف شديده جدا والتركيز والاداء عالى ونموذجى وده لانه برده بالطبع بيشتغل معاه فى الاداء
وده الى خلانى اقول فى موضوع سابق ليا قبل كده ان مش من المستحب انك تشغل مع يوم الظهر باى وتشغل مع يوم البنش تراى
الافضل هو باى مع البنش وتراى مع الظهر والتفسير :ء
(الباى اشتغل مع الظهر بالتالى مرهق فمترهقوش اكتر وتلعبه ـالتراى اشتغل مع البنش وبالتالى مرهق فمترهقوش اكتر وتلعبه العب العضلة الى عكسه )
فى نفس القاعدة الى بنتكلم عنها والى هى (( العضلة وعكسها ))
فى حالة اننا جينا وقسمنا الجسم الى اطراف علوية الذراع بالكامل واطراف سفلية الارجل بالكامل فهما بيعتبروا عضلات عكسية ايضا لوجود احدها اسفل الجسد واحدها اعلى الجسد
بالبلدى كده وبلغتنا فى كمال الاجسام لو عايز ونفسك فى دراع جامد سواء فى الباى او التراى او الساعد لازم رجــــــــــــــــليك تكون جامده عشان (( البرواز العضلى )) من اطراف علوية (دراع) جامدة ومثقلة العضلات واطراف سفلية (رجلين) جامده ومثقلة العضلات ايضا
وبديهى والكلام ده للناس الى مقصره فى حق رجليها ، فى حالة قوة رجليك كل جسمك بكل عضلاته بيصبح آلة قوية مدمرة للاوزان أوزانك بتزيد جسمك بيتزن اداءك بيكون عالى وبتحصل على السيمترية المطلوبة
ولازم نضيف حاجة ان لعب الرجلين بانتظام وبقوة بيعلى ويزيد من انتاج الهرمون الذكرى العامل الاول فى القوة العضلية
الخلاصة بالبلدى :ـ
العضلة بتجمد وتقوى بالعضلة الى وراها يعنى الى عكسها
* البنش بيقوى بالظهر والعكس صحيح
* الباى بيقوى بالتراى والعكس صحيح
* الدراع بيقوى بقوة وثقل عضل واتزان الرجلين
* البطن وجدارها من جانبيات ومنشاريات بتقوى بالقطنية وقوتها والعكس صحيح
شكرا لسعة صدركم معايا واسف على الاطالة كان الغرض منها الشرح الوفى لاهم قاعدة بكمال الاجسام
الموضوع من مجهودى الشخصى وليس له مصدر مرجعى مجهود خبرة 12 سنه تمرين وعمل بمجال كمال الاجسام على يد مدربين مش كلهم تحت الاضواء مش كلهم من المشاهير بل ان فيه ناس فيهم تحت التراب الان ولكن تم الاجماع منا جميعا على ان هى دى القاعده الاولى والاهم والاعظم فى عالم كمال الاجسام وممكن نقول ان الى بيدركها بدرى من أول دخوله كمال الاجسام بيتميز بدرى وبيوصل لقمة النضوج العضلى الى ممكن يوصله جسمه
أتمنى أن تكون رسالتي قد وصلت :)

Posted in: كمال الأجسام